Halos araw-araw akong sumasakay ng bus papuntang opisina. Kapag day off ko naman. madalas ay bumibiyahe naman ako papuntang Pangasinan para bisitahin si Pia at bus pa rin ang aking sinasakyan. Wala pa kasi akong kotse. Hinihintay kong maging piso isang tumpok bago ako bumili.
Ito ang ilang obserbasyon ko sa pagsakay ko sa bus.
Bus sa EDSA
Ayaw na ayaw kong sumakay sa ordinary bus. Masyadong kaskasero ang mga driver ng ordinary bus at kadalasa’y barumabado, bastos at walang modo ang mga konduktor. Hindi naman lahat, pero sa madalas ko ito masaksihan tuwing napapasakay ako sa ordinary bus. Katulad noong minsan na halos isang oras na sa paghihintay ng pasahero doon sa no loading and unloading zone at may nainip na pasahero. Bumaba ito at kinuha ang binayad na pamasahe. Binigay naman ng konduktor, pero sinigawan yung ale na susunod daw ay mag taxi sya.
Paborito ko naman ang Jross na aircon bus. Mga bago kasi ang bus nila at mabango sa loob ng bus. May mga bus kasi na nakakahilo ang amoy ng air freshener na ginagamit. Bihira din ako makatyempo ng barumbadong driver at konduktor sa Jross bus.
Victory vs Five Star
Five Star ako. Madami akong hindi magandang karanasan sa Victory Liner. Isang beses, ang nasakyan kong bus papuntang Pasay mula Pangasinan ay hindi nagbababa sa EDSA, terminal to terminal lang daw sila pwede magbaba. Kung maaga-aga pa lang yun, malamang ay bumaba ako at lumipat. Nakipagtalo pa ako sa kondukor pero sabi nya ay matagal na raw na policy yun ng MMDA, baka daw hulihin sila. Kaya imbes na ibaba ako sa Evangelista, doon pa ako sa Pasay Terminal bumaba. At dahil gabing-gabi na yun, nagtaxi na lang ako pauwi sa bahay. Kung sa Evangelista ako bumamaba, lalakarin ko na lang sana at bahay na. May sumpong siguro yung driver at ayaw ng patigil-tigil.
Madalas namang mangyari sa Victory na yung mga biyaheng Pasay ay hindi na tumutuloy sa Pasay at ibinababa ang mga pasahero sa Cubao terminal. Paghihintayin nila ang mga pasahero ang mga bus galing probinsya na tutuloy sa Pasay. Syempre pa nakipagtalo na naman ako kaya lang ano namang magagawa ko eh ayaw na nga bumiyahe ni Manong Driver. Naisip ko ngang magreklamo sa LTFRB kaya lang abala lang yun sa akin pag nagkataon. Iniiwasan ko na lang sumakay sa Victory Liner.
Mandurukot sa bus
Madalas ako makasaksi ng mga dukutan sa bus. Tuwing sasakay nga ako ng bus sa EDSA, nakaugalian ko na ngang tingnan muna ang mga nakasakay na pasahero at baka nandon yung mandurukot na madalas ko makita.
Madami silang Modus Operandi pero ang madalas ko makita ay yung tuwing maraming bababa at makikipagsiksikan sila habang yung isang kasama naman ay siyang dudukot ng mga cellphone o wallet sa mga bulsa o bag. Ang taga dukot nila na madalas ko makita ay yung matangkad na mamang may dalang bag (black at may sling na green) na wala naman yatang laman. Gamit nya yung bag para itago yung kamay nya.
Meron din namang lalansehin ka sa pamamagitan ng paghulog ng mga coins o di kaya naman ay hinahanap kunwari ang tiket nya. Kapag nakuha nya attention mo, may kasama sya na kukuha naman ng ng wallet o cellphone mo. hehe!
Kaya nga gusto ko na magkakotse. Ang tagal naman mag sale na piso isang tumpok. tsk!
